झापा– लागुऔषधको उच्च कारोवार हुने झापामा भारतीय मदिराको समेत अवैध कारोवार हुने गरेको पाईएको छ ।

रातको समयमा सवारी साधनमा हालेर भारतीय मदिरा नेपाली बजारमा भित्रिने गरेको पाईएको हो ।

मेचीराजमार्गमा पर्ने बुद्धशान्ति ४ बर्नेबाट प्रहरीले ‘सिक्किमे गोल्डेन’ नामको मदिरा बरामद गरेसँगै यस्तो कारोवार बाहिरिएको हो ।

जिल्ला प्रहरी कार्यालय झापाका अनुसार मे.१ ज ३३५१ नम्बरको कारमा ९५ बोतल भारतीय मदिरा फेला परेको हो । जसमा सिक्किमे गोल्डेन ८४ बोतल र फायरबल नामको मदिरा ११ बोतल रहेका छन् ।

यस अघि समेत प्रहरीले ‘सिक्किमे गोल्डेन’ छिटफुट बरामद गर्दै आएको थियो । प्रहरीले गाडी चालक ईलाम सुर्योदलय २ का प्रकाश खड्का सहित उनको गाडीबाट बरामद ९५ बोतल, यस अघि बरामद ‘सिक्किमे गोल्डेन’ तथा खड्का समेतलाई थप अनुसन्धानका लागि आन्तरीक राजश्व कार्यालय भद्रपुरमा बुझाएको छ ।