काठमाडौं– नेपाल कम्युनिस्ट पार्टी (नेकपा) प्रचण्ड–नेपाल समूहका नेता योगेश भट्टराईले प्रधानमन्त्री केपी शर्मा ओलीको संसद विघटन गर्ने निर्णयविरुद्ध परेका रिटमा स्वागतयोग्य फैसला भएको बताएका छन् ।

संसद विघटन बदरको फैसलासँगै नेता भट्टराईले ट्वीटरमा आफ्नो धारणा राख्दै सर्वोच्च अदालतले स्वतन्त्र र आफ्नो गरिमालाई उचा गरेको प्रतिक्रिया दिएका हुन् ।

‘सर्वोच्च अदालतले स्वतन्त्र न्यायालय र आफ्नो गरिमालाई उचा गरेको छ, मुलुक, लोकतन्त्र र व्यवस्थाको रक्षा गरेर तीन करोड नेपालीको सम्मान प्राप्त गरेको छ,’ नेता भट्टराईले ट्वीट गरेका छन् ।

साथै उनले सर्वोच्चको यो फैसलाले जनताको र लोकतन्त्रको जीत भएको बताएका छन् ।

गत पुस ५ गते प्रधानमन्त्री केपी शर्मा ओलीको सिफारिसमा राष्ट्रपति विद्यादेवी भण्डारीले संसद विघटन गरेकी थिइन् ।

उक्त कदम असंवैधानिक भएको भन्दै सर्वोच्चमा १३ वटा रिट परेका थिए । ती रिटमा सुनुवाइ गर्दै आज (मंगलबार) सर्वोच्चले प्रधानमन्त्री ओलीको संसद विघटन गर्ने निर्णय बदर गरेको हो ।