मनाली– बोलीका कारण विवाद र चर्चामा आइरहने बलिउड अभिनेत्री कंगना रनावतले गृहनगर मनालीमा खाद्य र पेय पदार्थका रुपमा क्याफे र रेस्टुरेन्ट खोल्ने भएकी छन् । अभिनेत्रीले मंगलबार आफ्नो आधिकारिक ट्वीटर एकाउन्टमा मनालीको तस्वीर राख्दै चाँडै नै क्याफे र रेस्टुरेन्ट सुरु हुने जानकारी दिएकी छन् ।

ट्रिब्युन इण्डियामा प्रकाशित समाचार अनुसार कंगनाले व्यवसायलाई ‘ड्रिम प्रोजेक्ट’ मानेकी छन् । फिल्मबाहेक कंगना खानेकुरामा पनि सौखिन छिन् ।

‘मेरो नयाँ उद्यम र नयाँ सपना तपाईंहरु समक्ष बाँड्दैछु । जसले हामीलाई नजिक ल्याउन सहयोग गर्नेछ । फिल्मबाहेक मेरो सोख खानेकुरामा पनि छ । फूड एण्ड बेभरेज उद्योगमा मेरो यो बाल पाइला हो । मनालीमा मेरो पहिलो क्याफे र रेस्टुरेन्ट हुनेछ । मेरो ठूलो समूहलाई विशेष धन्यवाद छ’, उनले ट्वीट गरेकी छन् ।