मुम्बई–दक्षिण भारतीय स्टार अक्किनेनी नागार्जुन १७ वर्षपछि बलिउडमा पुनरागमन गर्दैछन् । हालैमात्र उनले करण जोहारको व्यानर धर्मा प्रोडक्सनले निर्माण गरेको फिल्म ‘ब्रह्मास्त्र’को सुटिङ पुरा गरेका छन् ।

दैनिक भास्करका अनुसार अयान मुखर्जी निर्देशित फिल्ममा अमिताभ बच्चन, रणवीर कपूर र आलिया भट्टको अभिनय छ ।

‘मुम्बईमा मेरो यसरी स्वागत भयो कि म यहाँबाट कतै गएकै थिइनँ । करण र उनको टिमले मलाई राजा सरहको सम्मान दिए’, नागार्जुनले भनेका छन् ।

नागार्जुनका अनुसार फिल्ममा अमिताभसँग उनको कुनै दृश्य छैन । साइन्स फिक्सन फ्लेभरको यो फिल्ममा नागार्जुनले पुरातत्वविदको भूमिकामा अभिनय गरेका छन् ।

नागार्जुन पछिल्लोपटक सन् २००३ मा बलिउड फिल्म ‘एलओसीः कारगिल’मा देखिएका थिए ।