काठमाडौँ– नेपाल कम्युनिस्ट पार्टी (नेकपा)का अध्यक्ष तथा प्रधानमन्त्री केपी शर्मा ओलीले तत्कालीन विद्रोही माओवादीका जनमुक्ति सेनाका कमाण्डरहरुसँग छलफल गरेका छन् ।

शनिबार प्रधानमन्त्री निवास बालुवाटारमा पूर्व लडाकु कमाण्डरहरुसँग ओलीले छलफल गरेको प्रधानमन्त्रीका प्रेस सल्लाहाकार सूर्थ थापाले जानकारी दिए।

भेटका क्रममा ओलीले भने, ‘जनयुद्धको अवधिमा तपाईंहरूको योगदान, त्याग, बलिदान र क्रान्तिको सपनाप्रति सम्मान छ। नेतृत्वले तपाइँहरूका भावनाको दुरूपयोग गर्यो । यो तथ्य बुझेर यहाँहरू जुन निष्कर्षमा आइपुग्नुभयो, यो एकदमै सही छ। यसरी आइरहँदा तपाइँहरू ढुक्क हुनुहोस, हामी राजनीतिक रूपमा समस्याको वास्तविक समाधान गर्छौं। नेतृत्वबाट विगतमा जस्तो धोका पाउनुहुने छैन।’

ओलीलाई भेट्न तत्कालीन नेकपा (माओवादी) ले सञ्‍चालन गरेको सशस्त्र युद्धका केही कमाण्डरहरु बालुवाटार पुगेका थिए ।

प्रधानमन्त्री ओलीको सिफारिसमा पुस ५ गते राष्ट्रपतिले  प्रतिनिधिसभा विघटन गरेपछि सत्तारुढ नेकपा विभाजित छ ।

ओली समूह र दाहाल-नेपाल समूहले आ-आफ्ना गतिविधिलाई तीव्रता दिँदै आएका छन् । उनीहरु दुबै पक्ष अहिले कार्यकर्ता तानातानमा जुटेका छन् ।

‌प्रतिनिधसभा विघटन ओलीको असंवैधानिक र अलोकतान्त्रिक कदम भन्दै दाहाल-नेपाल समूह सडक संघर्षमा छ भने ओली समूहले तोकिएको समयमा चुनाव हुने भन्दै नेता तथा कार्यकर्तालाई चुनावको तयारीमा जुट्न निर्देशन दिँदै भेला तथा प्रशिक्षणका कार्यक्रम गर्दै आएको छ ।