सप्तरी– जनता समाजवादी पार्टी (जसपा) नेपालका वरिष्ठ नेता राजेन्द्र महतोले लोकतन्त्र र संघीयतालाई समाप्त पार्न प्रधानमन्त्री केपी शर्मा ओलीले ‘प्रतिगमन’को बाटो अपनाएको आरोप लगाएका छन् ।

सप्तरीको राजविराजमा शुक्रबार आयोजित पत्रकार सम्मेलनमा उनले प्रधानमन्त्री ओलीले लोकतन्त्र र संघीयतामाथि नै प्रहार गरेका कारण यसको रक्षा गर्न आफूहरु सडक आन्दोलनमा उत्रिएका बताए ।

उनले भने , ‘ओलीको प्रतिगमन परास्त गर्ने लडाइँमा छौँ, संविधानको रक्षा गर्नु हाम्रो दायित्व हो ।’

प्रतिनिधिसभा पुनर्स्थापना नै वर्तमान राजनीतिक समस्याको निकास रहेको बताउँदै महतोले सम्मानित अदालतबाट समस्याको निकास निस्किनेमा विश्वास व्यक्त गरे ।

उनले अदालतबाट आउने फैसला आफूहरुलाई मान्य हुने बताउँदै लोकतन्त्रमा चुनावबाट भाग्न नमिल्ने समेत बताएका थिए ।