काठमाडौँ– आफूलाई सामाजिक अभियान्ता दाबी गर्ने ज्वाला संग्रौलासहित ३ जनामाथि थप अनुसन्धान गर्न प्रहरीले जिल्ला प्रशासन कार्यालय मार्फत ३ दिनको अनुमति पाएको छ।

अभद्र व्यवहारको कसुरमा आइतबार पक्राउ परेकी संग्रौला सहित तीनैजनालाई ३ दिन थुनामा राखेर अनुसन्धान गर्न जिल्ला प्रशासन कार्यालय काठमाडौंले अनुमति दिएको महानगरीय प्रहरी परिसर काठमाडौंले जनाएको छ ।

महानगरीय प्रहरी वृत्त गौशालाभित्रै खुश्बु घिमिरेमाथि कुटपिट गरेको घटनाको अनुसन्धानका लागि संग्रौलासहित हिमाल उपाध्याय र शर्मिला वाइबालाई प्रहरीले आइतबार पक्राउ गरेको थियो ।

संग्रौलासहित उनको समूहका व्यक्तिले अघिल्लो महिना महानगरीय ट्राफिक प्रहरी वृत्त महाराजगञ्जका प्रहरी सहायक निरीक्षक मणिकान्त झामाथि रंगभेदी दूर्व्यवकार गरेका थिए। उक्त घटनाबारे मधेशी आयोगमा उजुरी परेको थियो।