काठमाडौँ– नेपाली कांग्रेसका नेता गगन थापाले राष्ट्रपति विद्यादेवी भण्डारीलाई प्रधानमन्त्री केपी शर्मा ओलीको जालझेलमा नपरी संविधानअनुरुप काम गर्न आग्रह गरेका छन् ।

परिस्थितले अन्तिम पटक सुध्रिने मौका दिएको बताउँदै उनले राष्ट्रपतिलाई अहिले ओलीको बचाउमा नलागी संविधानसंगत रुपले काम गर्न आग्रह गरेका हुन् ।

उनले सामाजिक सञ्जालमार्फत प्रधानमन्त्री ओलीको ‘जालझेल र अपराधमा साथ दिँदा लागेको दाग’ मेटाउने अन्तिम अवसर भएको उल्लेख गरेका छन् ।

‘१५३ जनाको समर्थन भएको भए सरकारले ७६(३)को विश्वासको मत लिने वैधानिक बाटो किन छोडेको ?’, उनले फेसबुकमा लेखेका छन्, प्रधानमन्त्रीले नै’म विश्वासको मत लिन सक्दिनँ र पहिलाभन्दा तात्त्विक फरक छैन भनेर ७६(५)को सरकार गठनको ढोका खोल्ने,राष्ट्रपतिले’विश्वासको मत प्राप्त गर्ने आधार नदेखिएको’भन्दै आह्वान गर्ने। अब फेरि जालझेल !’

उनले आज प्रधानमन्त्रीले बहुमतको समर्थन छ भन्दै दाबी गर्नु असङ्गत मात्र नभएर अवैधानिक र अनैतिक भएको समेत टिप्पणी गरेका छन् ।

उनले फेसबुकमा लेखेका छन्, ‘राष्ट्रपतिज्यू,तपाईंमा ओलीको जालझेल र अपराधमा साथ दिँदा लागेको दागै दाग छ । महामहिमलाई परिस्थितिले अन्तिम पटक सुध्रिने मौका दिएको छ!! नभए भिर बाट खस्ने लाई राम राम !’