काठमाडौँ– नेकपा एमालेका नेता गोकर्ण बिष्टले एकता पूर्वको एमालेका सम्पूर्ण आधिकारिक कमिटीहरु ब्युँत्याएर विधिमार्फत् समाधान खोज्न आग्रह गरेका छन् ।

उनले सामाजिक सञ्जाल फेसबुकमा लेख्दै नेकपा एमालेमा देखा परेका समस्याहरुको समाधानकालागि संयमित र जिम्मेवारीपूर्ण पहल गर्नुपर्ने बताए ।

प्रधानमन्त्रीसमेत रहेका पार्टी अध्यक्ष केपी शर्मा ओली नेताहरुलाई स्पष्टीकरण सोधेपछि विष्टले पार्टीभित्रको समस्या जिम्मेवारपूर्ण ढंगले समाधान गर्नुपर्ने बताएका हुन् ।

उनले सामाजिक सञ्जालमा लेखेका छन्, ‘विगत केही समय यता नेकपा एमालेमा देखापरेका समस्याहरुको समाधान गर्न संयमीत र जिम्मेवारीपूर्ण पहल गर्नुको साटो एकपछि अर्को एकतर्फी र बिनाकारण सांसदमाथी कारबाहीका घटनाहरु अघि बढाइएको छ । यस्ता कारबाहीका शृखंलाहरुले पार्टी एकतामा गम्भीर संकट पैदा गरेको छ ।’

उनले संवादहीनता र कारबाहीको बाटोबाट समस्या समाधान नहुने बताएका छन् । उनले भनेका छन्, ‘अदालतको फैसला बमोजिम एमालेलाई नेकपा एकतापूर्वको अवस्थामा फर्काएर पार्टीलाई विचार र विधिबाट सञ्चालन गरेर नै एकता जोगाउन सकिन्छ । एउटा इमान्दार कार्यकर्ताको पदीय हैसियतभन्दा पार्टी र आन्दोलनको भविष्य सधैँ माथी हुन्छ ।’

उनले लेखेका छन्, ‘एमालेका नेता, कार्यकर्ता, समर्थक र शुभचिन्तकको चाहना बमोजिम एकतापूर्वको एमालेका सम्पूर्ण आधिकारिक कमिटीहरु ब्युँताएर विधिमार्फत समाधान खोज्न म आग्रह गर्दछु । पार्टी एकताको रक्षा गरौं ।’

https://www.facebook.com/Gokarna.bistauml/posts/4323326294353643