काठमाडौँ– राष्ट्रिय एकता अभियानले बंगलादेशमा मन्दिर तथा हिन्दू आराध्य देवी देवताको प्रतिमा तोडफोड भएको घटनाको निन्दा गरेको छ ।

अभियानले बंगलादेशको घटनामा दोषीलाई कडा कारबाही गर्न सरकारसँग माग पनि गरेको छ।

नेपालस्थित बंगलादेश राजदूतावासमार्फत प्रधानमन्त्री शेख हसिनालाई ज्ञापनपत्र बुझाउँदै अभियानले बंगलादेशका हिन्दू समुदायको सुरक्षाको माग गरेको हो ।

अभियानका केन्द्रीय अध्यक्ष विनय यादव नेतृत्वको टोलीले नेपालका लागि बंगलादेशी राजदूत सालाऊदीन रमन चौधरीमार्फत प्रधानमन्त्री हसिनालाई ज्ञापनपत्र पठाएको हो ।

‘बंगलादेशमा भएको घटनाले नेपालको सम्पूर्ण हिन्दू समुदायलाई चोट पुर्‍याएको छ । बंगलादेशमा हिन्दू जनसंख्या र पूजास्थलमा संगठित भीडको हमलाको खबरबाट हामीलाई गहिरो आघात पुगेको छ । बंगलादेशमा हिंसा फैलिएपछि बुधबारदेखि कम्तिमा ६ जनाको मृत्यु भएको र १०० भन्दा बढी घाइते भएको पुष्टि भएको छ, १७ हिन्दू मन्दिरमा हमला भएको छ र त्यहाँका मूर्तिहरु तोडफोड भएको छ, ज्ञापनपत्रमा भनिएको छ ।

अभियानले जारी हिंसा रोक्ने अभियान चलाउन पनि बंगलादेश सरकारसँग माग गरेको छ ।

अभियानले बुझाएको ज्ञापनपत्र