काठमाडौँ- समाजसेवी मित्रसेन दाहालको निधन भएको छ । शुक्रबार बिहान हृदयाघातका कारण उनको निधन भएको हो । २०१९ सालामा ओखलढुङ्गाको रामपुरमा जन्मेका दाहाल काठमाडौँको चावहिलमा बस्दै आएका थिए ।

पारिवारिक स्रोतका अनुसार दाहाल बिहान आज बिहान करिब पौने आठ बजे घरमा अचानक अस्वस्थ भएका थिए । उनलाई तुरुन्तै ओम अस्पताल पुर्‍याइएकोमा चिकित्सकहरुले पौने दश बजे मृत घोषणा गरेका थिए ।

दाहालका श्रीमती, दुई छोरा र एक छोरी छन् । आजै उनको दाहसंस्कार गरिने भएको छ ।

दाहाल आफू अध्यक्ष रहेको जेपी फाउन्डेसनमार्फत दुई दशकभन्दा लामो समयदेखि समाजसेवामा सक्रिय थिए । फाउन्डेसनले काठमाडौँको लप्सेफेदीमा ‘ज्येष्ठ नागरिक मैत्री सेवा आश्रम’ सञ्चालन गरेको छ ।

दाहाल नेपाली कांग्रेसमा सक्रिय थिए । उनी २०७४ सालको आमनिर्वाचनमा ओखलढुङ्गाको क्षेत्र नं १ मा नेपाली कांग्रेसबाट प्रदेशसभा सदस्य पदका उम्मेदवार थिए । उनी राजनीतिक सक्रियताका क्रममा जेल समेत परेका थिए ।

कांग्रेस सभापति शेरबहादुर देउवाले दाहालको निधनमा दुःख प्रकट गरेका छन् ।