काठमाडौँ– जनता समाजवादी पार्टी (जसपा) का अध्यक्षद्वय महन्थ ठाकुर पक्ष र उपेन्द्र यादव पक्षले पार्टीको आधिकारिकतामा आआफ्नो दाबी गरेका छन् ।

आइतबार निर्वाचन आयोगमा भएको सुनुवाइका क्रममा दुवै पक्षले पार्टीको आधिकारिकताको दाबी गरेका हुन् । आयोगमा पुगेर दुवै पक्षका नेताहरुले पार्टीको नाम, चिह्न आफूहरुले पाउनुपर्ने बताएका छन् भने दुवै पक्षले आफूसँग बहुमत कार्यकारिणी सदस्य रहेको दाबी गरेका छन् ।

सुनुवाइपछि जसपा अध्यक्ष यादव पक्षका नेता महेन्द्र राय यादवले पार्टी आधिकारिकताका बारेमा भएको माग दाबीमा विधि र विधान अनुरुप टुङ्गो लगाउनुपर्ने बताए ।

आफूहरूको हस्ताक्षरलाई सर्वोच्चले समेत मान्यता दिएकाले आफूहरूसँग बहुमत सदस्य रहेको उनको भनाइ छ । अर्को पक्षले नै पार्टीबाट अलग्गिने बताएको उनले बताए ।

त्यस्तै महन्थ पक्षका नेता लक्ष्मणलाल कर्णले अर्को पक्षको दाबी कानूनसम्मत नरहेको बताए । उनले आयोगले जसपाका बारेमा छिटै निर्णय गर्नुपर्ने धारणा राखे ।

पार्टीको आधिकारिकता विवाद निरुपणका लागि राजनीतिक दलसम्बन्धी ऐनको दफा ४३ र ४४ अन्तर्गत आयोगले सुनुवाइ भएको हो ।

आयोगले सुनुवाइका लागि प्रमुख निर्वाचन आयुक्त दिनेशकुमार थपलियाको नेतृत्वमा आयुक्तहरुको ५ सदस्यीय इजलास गठन गरेको छ ।