काठमाडौँ- बुन्डेस लिगा च्याम्पियन बायर्न म्युनिख प्रि-सिजनको पहिलो मैत्रीपूर्ण खेलमा पराजित भएको छ ।

शनिबार राति सम्पन्न खेलमा एफसी कोल्नसँग बायर्न ३-२ गोलले पराजित भएको हो ।

सुरुवाती अग्रता बार्यनले बनाए पनि कोल्नले पुनरागमन जित निकालेको थियो । खेलको छैटौँ मिनेटमा अर्मिन्डो सिएबले गोल गर्दै बायर्नलाई अग्रता दिलाएका थिए । २०औँ मिनेटमा जान थिलमानले गोल गर्दै कोल्नलाई १-१ गोलको बराबरीमा ल्याए ।

२७औँ मिनेटमा मार्क उथले गोल गर्दै कोल्नलाई २-१ को अग्रता दिलाए । ३५औँ मिनेटमा जोशुवा जिर्कजीले गोल गर्दै बायर्नलाई २-२ गोलको बराबरीमा फर्काए ।

खेलको ५६औँ मिनेटमा मार्कले व्यक्तिगत दोस्रो गोल गर्दै कोल्नलाई ३-२ को जित दिलाए ।