काठमाडौँ- अनामनगरमा एक महिलाको हत्या भएको छ । अनामनगरस्थित बुलबुले मार्गमा हिँडिरहेको महिलाको हत्या भएको प्रहरीले जनाएको छ ।

यो घटना शनिबार साँझको हो । साँझ ७ बजेको समयमा बाटोमा हिँडिरहेकी ४८ वर्षीय रोशनी राजभण्डारीलाई फलामको रड प्रहार गरी हत्या भएको प्रहरीले जनाएको छ । हत्याको अभियोगमा उनकै देवर पक्राउ परेका छन् ।

घटनाको अनुसन्धान भइरहेको जानकारी दिँदै महानगरीय प्रहरी कार्यालय, रानीपोखरीका एसएसपी सुशील सिंह राठौंरले फलामको रड प्रहारबाट हत्या भएको पाइएको बताए ।

उनले भने, ‘महिला बाटोमा हिँडिरहेकी थिइन। त्यही समयमा आएर हानेको बुझिएको छ। थप अनुसन्धान गरिरहेका छौँ ।’

अनुसन्धानमा खटिएका एक प्रहरी अधिकृतका अनुसार हत्या गरेपछि मृतकका देवर मोहनराज राजभण्डारी आफैँ प्रहरी कार्यालय पुगेका थिए ।

पहिलेदेखिनै देवर भाउजुबीच मनमुटाव भएकाले रिसइबीका कारण आवेगमा हत्या भएको हुनसक्ने प्रहरीको अनुमान छ ।