विराटनगर । प्रदेश १ को प्रदेशसभाको हिउँदे अधिवेशन अन्त्य भएको छ । माघ ७ गते शुरू भएको प्रदेशसभाको सातौं अधिवेशन मन्त्रिपरिषदको सिफारिसमा प्रदेश प्रमुख सोमनाथ अधिकारी प्यासीले आइतबार राति १२ बजेदेखि लागू हुनेगरी अन्त्य गरेका हुन् ।

मुख्यमन्त्री शेरधन राईविरुद्ध अविश्वास प्रस्ताव दर्ता भएपछि प्रदेशसभाको हिउँदे अधिवेशन माघ ७ गतेको लागि बोलाइएको थियो ।

विपक्षी दलहरूले चालु वर्षका लागि स्वीकृत कार्यक्रमहरू सुचारू गर्नुपर्ने, विकास आयोजनालाई निरन्तरता दिनुपर्ने, अलपत्र रहेका बहुबर्षे विकास आयोजनाको काम सुचारु गर्नुपर्ने माग गर्दै पछिल्ला बैठक अवरुद्ध गरिरहेका थिए । आइतबारको बैठक शुरूमै प्रतिपक्षले उठेर विरोध जनाएपछि सभामुख प्रदीपकुमार भण्डारीले आफ्ना कुरा राख्न प्रतिपक्षलाई समय उपलब्ध गराएका थिए ।

नेपाली कांग्रेसका प्रमुख सचेतक केदार कार्कीले आफूहरूले उठाएका माग पूरा नभएसम्म विरोध जारी रहने दोहोर्‍याएका थिए । पटक पटक प्रतिपक्ष सांसदलाई बस्न आग्रह गरेपनि अटेर गरेपछि अवरोधका बीच सभामुख प्रदीपकुमार भण्डारीले प्रदेश प्रमुखबाट प्राप्त अधिवेशन अन्त्यको पत्र पढेर सुनाएका थिए ।

अधिवेशन अन्त्य भएपछि प्रदेश सरकारका प्रवक्ता एव आन्तरिक मामिला तथा कानूनमन्त्री हिक्मत कार्कीले प्रतिपक्षले सरकारलाई आफ्ना कुरा राख्ने मौका पनि नभएकाले अधिवेशन अन्त्यको गर्नु सरकारको बाध्यता भएको बताए ।

गएको माघ ७ गतेबाट शुरु भएको हिउँदे अधिवेशन कुल २ घण्टा ३१ मिनेट चलेको थियो । यो अवधि कुल आठ वटा बैठक संचालन भएपनि कार्यव्यवस्था तथा परामर्श समितिको सल्लाहमा तय गरेको कार्यसूचीमा बैठक प्रवेश नै नगरी अधिवेशन अन्त्य भएको छ ।