बर्दिया- बर्दियाको खाता जैविक मार्ग क्षेत्रबाट अर्को नरभक्षी बाघलाई पनि नियन्त्रणमा लिइएको छ।

नेपाल प्रकृति संरक्षण कोषको प्राविधिक टोलीले बिहीबार मान्छे खान पल्किएको दास्रो बाघलाई पनि नियन्त्रणमा लिएको हो ।

नरभक्षी दोस्रो बाघलाई पनि नियन्त्रणमा लिइएको डिभिजन वन कार्यालय बर्दियाले जनाएको छ । जैविक मार्ग क्षेत्रभित्र पर्ने गैरी सामुदायिक वनबाट वयस्क भाले बाघ डार्ट गरी नियन्त्रणमा लिइएको हो ।

बाघलाई प्राविधिकले बेहोस पारी नियन्त्रणमा लिइएको डिभिजन वन कार्यालय बर्दियाका डिभिजन अधिकृत महेन्द्रराज वाग्लेले जानकारी दिए । बुधबार मात्रै बर्दियाको गेरुवा क्षेत्रबाट बर्दिया निकुञ्जको टोलीले एक बुढो भाले पाटेबाघ नियन्त्रणमा लिएको थियो ।

त्यसको भोलिपल्टै मान्छे खान पल्किएको अर्को बाघ पनि नियन्त्रणमा लिइएको हो । मङ्गलबार दिउँसो मात्रै एक महिलालाई बर्दिया राष्ट्रिय निकुञ्जभित्र निगुरो खोज्न जाने क्रममा पाटेबाघले नै आक्रमण गरी ज्यान लिएको थियो । लगत्तै निकुञ्जको प्राविधिक टोलीले अनुगमन गरिरहेको थियो ।

बुधबार नियन्त्रणमा लिइएको बाघलाई बने बर्दिया राष्ट्रिय निकुञ्जको रम्मापुर सेक्टरमा रहेको उद्धार केन्द्रमा राखिएको छ ।

यसअघि पनि बर्दियाको गेरुवा क्षेत्रबाटै निकुञ्जको टोलीले एउटा बाघ नियन्त्रणमा लिएको थियो । बर्दियामा बाघको आक्रमणबाट यस बर्ष मात्रै १० जनाले ज्यान गुमाइसकेका छन् । खाता करिडोरमा मात्रै बाघले आक्रमण गर्दा ५ जनाले ज्यान गुमाएका थिए ।