झापा– प्रतिनिधीसभा विघटनको निर्णयपछि प्रधानमन्त्री केपी शर्मा ओली पहिलो पटक गृहजिल्ला झापा आउने भएका छन् ।

आगामी फागुन १६ गते उनी झापा आउने उनको सचिवालयले जनाएको छ । ओलीको सचिवालय सदस्य नेकपा झापाका नेता होमबहादुर थापाका अनुसार १६ गते बिहान पहिलो उडानमार्फत ओली झापा आउने र बेलुका फर्कने कार्यतालिका छ ।

विभिन्न पूर्वाधारहरुको शिलन्यास र उद्घाटनका लागि सरकारी कार्यक्रम अनुसार प्रधानमन्त्रीको झापा एवम् गृहनगर भ्रमण तय भएको सचिवालयले जनाएको छ ।

यस्तो छ, कार्यतालिका
ओली झापा आएपछि पहिलो कार्यक्रमका लागि आफ्नै निर्वाचन क्षेत्रमा पर्ने कमल गाउँपालिकाको क्याम्पा पुग्ने छन् । त्यहाँ कमल खोलामा निर्माण भएको पुल उद्घाटन गर्ने कार्यक्रम छ ।

यसपछि दमक १ बाट ईलामको चुलाचुली जोड्ने रतुवा खोलामा पुल शिलान्यासको कार्यक्रम तय गरिएको छ । सचिवालयका अनुसार मदन भण्डारी चुरे राजमार्गमा पर्ने सो स्थापनको पुलसँगै पूर्वी खण्डका ३१ ओटा पुलको त्यहिबाट एकैचोटी शिलान्यासको घोषणा हुनेछ ।

औद्यागिक पार्कको पनि शिलान्यास
पूर्वीनेपालमा चर्चामा रहेको चाईना–नेपाल फ्रेण्डसीप क्लिन ईण्डष्ट्रियल पार्कको समेत ओलीले आगामी फागनु १६ गते शिलान्यास गर्नेछन् ।

दमक १०, कमल–७ र गौरादह–५ को संगम स्थलमा पार्कको शिलान्यास पछि सोही ठाउँमा आयोजना हुने सभामा ओलीले सम्बोधन गर्ने जनाईएको छ ।

सचिवालयका अनुसार दिनभरिका अन्य कार्यक्रममा भने सम्बोधनको सुची रहेको छैन । सो कार्यक्रममा उद्योग मन्त्री लेखराज भट्ट, भौतिक पूर्वाधार मन्त्री वशन्त नेम्वाङ, प्रदेश १ का प्रदेश प्रमुख तथा मुख्यमन्त्री शेरधन राई एवम् पूर्वसभामुख सुवास नेम्वाङ पनि सहभागी हुनेछन् ।