काठमाडौं – केही वर्षदेखि नेपाली फिल्म वृत्तमा ‘पारस’ निर्माण हुने र सो फिल्मलाई निर्माता माधव वाग्लेले निर्देशन गर्ने चर्चा थियो ।

माधव वाग्लेको डेब्यु निर्देशन रहने भएकाले पनि फिल्मलाई चासोका साथ हेरिएको थियो । फिल्ममा अनमोल केसीको पनि शीर्ष भूमिका रहने फाइनल भइसकेको थियो ।

सो फिल्ममा शुरुदेखि नै माधव वाग्लेले काम गर्ने भनिए पनि वाग्लेले उक्त फिल्मबाट हात झिकेका छन् । भुवन केसीले फिल्मको कथा नै तोडमोड गरेपछि आफूले हात झिकेको वाग्लेले बताएका छन् ।

खबरहबको कुराकानीमा वाग्लेले अर्को प्रोजेक्टको तयारी थालेको बताए । उनका अनुसार अब बन्ने फिल्म सामाजिक कथामा आधारित हुनेछ ।

यद्यपि फिल्मको नाम र कलाकारबारे उनले बताउन चाहेनन् । ‘कथा चित्त नबुझेपछि मैले प्रोजेक्ट नै उहाँहरुलाई जिम्मा दिएँ, नयाँ प्रोजेक्टको तयारीमा छु,’ वाग्लेले भने ।

नयाँ फिल्ममा कलाकार को को रहने भन्नेबारे अझै तय नभएको बुझिएको छ । निर्माता वाग्लेले पत्रकार सम्मेलन गरेर फिल्मको घोषणा गर्ने तयारी थालेका छन् ।