काठमाडौँ– काठमाडौँ विश्वविद्यालय (केयू)ले झापास्थित बी एण्ड सी मेडिकल कलेजलाई सम्बन्धन दिन चिकित्सा शिक्षा आयोगलाई सिफारिश गरेको छ ।

केयूको ८९ औं बैठकले सम्बन्धन प्रक्रिया अगाडि बढाउने निर्णय गरेको हो । सम्बन्धन प्रक्रिया अगाडि बढाउन शिक्षामन्त्री कृष्णगोपाल श्रेष्ठले दबाब दिँदै आएका थिए । त्यसअनुसार विश्वविद्यालयको विज्ञ सम्मिलित टोलीले वैशाख २२ देखि २६ गतेसम्म कलेजको निरीक्षण गरेको थियो ।

३१ वैशाखमा बसेको केयू कार्यकारी परिषदको ६२५ औं बैठकले निरीक्षण प्रतिवेदनका आधारमा चिकित्सा शिक्षा ऐनको दफा १३(६) अनुसार सम्बन्धनका लागि सहमति दिने र सीट संख्यासहित स्वीकृतिका लागि आयोगमा पठाउने निर्णय गरेको छ ।

व्यवसायी दुर्गा प्रसाईंले सञ्चालनमा ल्याएको बी एण्ड सीलाई शिक्षण अस्पतालको सम्बन्धन दिने सरकारी निर्णयको लामो समयदेखि विरोध हुँदै आएको छ । चिकित्सा शिक्षा सुधारका अभियान्ता डा. गोविन्द केसीले उक्त अस्पताललाई शिक्षण अस्पतालको सम्बन्धन नदिन भन्दै पटक पटक विरोध गर्दै आएका थिए ।

हेर्नुहोस् पत्र