मुम्बई– अभिनेता सोनू सूदलाई कोरोना संक्रमण भएको छ । उनले सामाजिक सञ्जालमार्फत आफूलाई संक्रमण भएको जानकारी दिएका छन् ।

दैनिक जागरणमा प्रकाशित समाचारअनुसार उनले आफूलाई क्वारेन्टाइनमा राखेका छन् । ‘कोरोना भाइरस मोड र स्पिरिट सुपर पोजेटिभ छ । नमस्कार साथीहरु, म तपाईंहरुलाई सूचित गर्न चाहन्छु कि कोभिड–१९को टेस्ट पोजेटिभ आएको छ । त्यहीकारण मैले आफूलाई क्वारेन्टाइन गरेको छु । चिन्ताको विषय छैन । अब मलाई पहिलाको भन्दा बढी समय मिल्नेछ । एउटा कुरा नबिर्सनुहोला, समस्या पर्दा म जहिल्यै तपाईंको साथमा हुनेछु’, उनले लेखेका छन् ।

सोनू बलिउडको रुचाइएका अभिनेतामा पर्छन् । कोरोना महामारीका समयमा उनले कैयौं मानिसलाई सहयोग गरेका थिए । केही समय अघि मात्र कोभिड भ्याक्सिन लगाउनका लागि उनी पञ्जाब पुगेका थिए । उनले कोभिड भ्याक्सिन नलगाएकाहरुलाई लगाउन आव्हान गरेका थिए ।