मुम्बई– तमिल फिल्मका प्रख्यात अभिनेता विवेकको शनिबार बिहान ५९ वर्षको उमेरमा निधन भएको छ । हृदयघात भएपछि उनलाई शुक्रबार चेन्नईको एक निजी अस्पतालमा भर्ना गरिएको थियो ।

दैनिक भास्करमा प्रकाशित समाचारअनुसार उनले शनिबार विहान ४ बजेर ३५ मिनेटमा अन्तिम श्वास फेरेका थिए । उनको निधन पछि तमिल फिल्म उद्योगमा शोक छाएको छ ।

उनमा टाउको दुख्ने समस्या भएपछि दुई दिन अघि अस्पताल भर्ना गरिएको थियो । परिवारका अनुसार टाउको दुखेपछि उनी घरमै बेहोस भएका थिए । डाक्टरले हृदयघातका कारण उनको लेफ्ट कोरोनरी ब्लड भेसल सत प्रतिशत बन्द भएको उल्लेख गरसेका छन् ।

उनले शुक्रबारमात्र कोभिड भ्याक्सिन लगाएका थिए । भ्याक्सिनका कारण उनको निधन भएको हल्ला चले पनि डाक्टरले उनको स्वास्थ्य बिग्रनुमा भ्याक्सिन कारक नरहेको प्रष्ट पारेका छन् ।

विवेक फिल्ममा विशेषत कमेडी चरित्रका लागि चिनिन्थे । उनले २ सय बढी फिल्ममा काम गरिसकेका छन् । उनले रजनीकान्त, कमल हासन, अजित, विजय, माधवन, विक्रम, धनुष जस्ता सुपरस्टारसँग स्क्रिन शेयर गरिसकेका छन् ।

माधवनको फिल्म ‘रन’ उनका लागि सबैभन्दा ठूलो ब्रेक साबित भएको थियो । सन् २००७ मा रिलिज रजनीकान्तको फिल्म ‘शिवाजी द बोस’ मा विवेकले दमदार अभिनय गरेका थिए । उनले सन् २००९ मा पद्मश्री अवार्ड पाएका थिए ।