मुम्बई– बलिउडमा कोरोना संक्रमणको लहर दिनानुदिन बढ्दो छ । अभिनेता रणवीर कपूर, निर्देशक सञ्जय लीला भन्साली र अभिनेता मनोज वाजपेयीपछि अब यो सूचीमा अभिनेता सिद्धान्त चतुर्वेदी पनि जोडिएका छन् ।

एबीपी लाइभमा प्रकाशित समाचार अनुसार फिल्म ‘गली ब्वाइ’का यी अभिनेताले सामाजिक सञ्जालमार्फत आफूलाई कोरोना पोजेटिभ भएको जानकारी दिएका हुन् ।

उनले इन्स्टाग्राममा एक तस्वीर शेयर गरेका छन् । ‘अहिले त कोरोना भ्याक्सिन आउने कुरालाई खुशी भइरहेको थिएँ । कोरोनाले मलाई नै आक्रमण गर्यो । म अहिले ठिक हुने अवस्थामा पुगिसकेको छु’, उनले लेखेका छन् ।

उनले आफूलाई क्वारेन्टाइनमा राख्दै चिकित्सकको सल्लाह अनुसार उपचार गरिरहेको उल्लेख गरेका छन् ।

कामको कुरा गर्दा सिद्धान्त चाँडै नै अभिनेत्री दीपिका पादुकोणका साथ एक फिल्ममा देखिँदैछन् । यसबाहेक उनी ‘बन्टी और बबली २’ तथा ‘फोन भूत’मा पनि व्यस्त छन् ।