बागलुङ– गण्डकी प्रदेश सरकारका भूमी व्यवस्था, कृषि सहकारी तथा गरिबी निवारण मन्त्री चन्द्र बहादुर बुढाले जनप्रतिनिधि जनताप्रति उत्तरदायी हुनुपर्ने बताएका छन् । ताराखोला गाउँपालिका वडा नं ३ हिल घुस्मेलीमा त्रिशुली युवा क्लवले आयोजना गरेको हरिबोधनी एकादशी मेलालाई सम्वोधन गर्दै मन्त्री बुढाले यस्तो बताएका हुन् ।

जिल्लाको दुर्गम गाउँमा रहेर पनि क्लवले सामाजिक क्षेत्रमा पुर्‍याएको योगदानको प्रशंसा गर्दै मन्त्री बुढाले गाउँमा भएका प्राकृतिक स्रोत, कृषि, वन पैदावार उपयोग गरेर उत्पादनमा जोडिन आम नागरिकलाई आग्रहसमेत गरे । उनले गण्डकी प्रदेश सरकारले एक घर एक धाराको अवधारणा अनुसार ताराखोला गाउँपालिकामा सबै घरधुरीमा खानेपानी पुर्‍यमउने लक्ष्य राखेको बताए ।

गण्डकी प्रदेशका सांसद दिलमाया रोकाले युवाहरु समाज परिवर्तनका संवाहक भएकोले युवाहरुले समाज रुपान्तपणमा सकरात्मक र रचनात्मक भूमिका खेल्नुपर्ने बताइन् । संस्थाले गाउँपालिका भित्र गरेका सामाजिक गतिविधिले आफू हर्षित भएको उल्लेख गर्दै सरकारको तर्फबाट गर्नुपर्ने आवश्यक सहयोगमा आफू प्रतिवद्व रहेको उनको भनाइ छ । त्यस्तै ताराखोला गाउँपालिकाका अध्यक्ष प्रकाश घर्तीले युवाहरु विकास निर्माणका काममा अग्रसर भए समाजले छोटो समयमा नै काँचुली फेर्ने बताए ।

मेलाको अवसरमा आयोजना गरिएको खुल्ला वडास्तरीय पुरुष भलिबल प्रतियोगितामा नगद रु ६५ हजार ट्रफी र मेडलसहित सामाजिक संस्था घुम्टे युवा परिवार गलकोट नगरपालिका ७ मल्मले उपाधि उचालेको छ । प्रतियोगितामा गलकोट नगरपालिका वडा नं २ नरेठाँटी दोस्रो भएको छ । मेलामा सामूहिक लोक नृत्य लगायतका विविध कार्यक्रम आयोजना गरिएको संस्थाका अध्यक्ष जीवन बस्नेतले जानकारी दिए ।