काठमाडौँ– वाणिज्य, आपूर्ति तथा उपभोक्ता संरक्षण विभागले विभिन्न व्यक्ति तथा कम्पनीहरुले गैरकानूनी रुपमा अनलाइनको माध्यमबाट नेटवर्किङ शैलीमा व्यवसाय संचालन गरी ठगी गरेको पाइएको भन्दै यसतर्फ सचेत रहन आग्रह गरेको छ ।

विभागले सूचना जारी गर्दै विभिन्न व्यक्ति तथा कम्पनीहरुले नेटवर्किङ शैलीमा व्यवसाय सञ्चालन गरी नेपाल तथा विदेशमा रहेका नेपालीहरुलाई त्यसमा आवद्ध गराइ ठगी गरेको तथा पुँजी पलायन गरेको गुनासो तथा उजीरीहरु विभागमा परेको भन्दै त्यसतर्फ सचेत रहन आग्रह गरेको हो ।

विभागका निर्देशक एवं प्रवक्ता शिवराज सेढाईंले स्वदेश तथा विदेशमै पनि सोजासाझा नेपालीहरुलाई यस्ता व्यवसायमा आवद्ध गराइ ठगी गर्ने गरेको पाइएको बताए ।

‘नेपाली उपभोक्ताको कमजोर चेतनास्तरको फाइदा उठाउँदै स्वदेश तथा विदेशमै पनि यसरी नेटवर्किङ व्यवसायमा फसाउने गरेको पाइएको छ, विदेशमा भएकाहरुले विदेशमै र नेपालमा भएकाहरुले नेपालमै यस्ता धन्दा चलाएर ठगी गर्नेहरुप्रति सचेत रहनुहोला’, प्रवक्ता सेढाईंले भने , ‘यस्तो ठगी धन्दामा संलग्नलाई कानून बमोजिम कडा भन्दा कडा कारबाही हुनेछ ।’

हाइपर फण्ड ग्लोबल, जोएकोल, सीआरयू, विन्टर, क्राउड वन, सोलेम्याक्स, पोइन्ट विस लगायतका स्वदेशी तथा विदेशी कम्पनीहरुले यस्तो काम गरिरहेको विभागद्वारा जारी सूचनामा उल्लेख गरिएको छ ।

विभागद्वारा जारी सूचनामा भनिएको छ, ‘गुनासो तथा उजुरीका आधारमा केही व्यक्ति, फर्म तथा कम्पनीहरु उपर अनुसन्धान, जाँचबुझ तथा छानविन भइरहेको छ । त्यस्ता गैरकानूनी व्यावसायिक काम कारबाही गरे / गराएमा कानूनले १० लाख रुपैयाँसम्म वा ५ वर्षसम्म कैद वा दुबै सजाय हुन सक्ने व्यवस्था गरेको हुनाले त्यस्ता कार्य नगर्न/नगराउन तथा ठगीबाट सचेत रहन सबैमा सूचित गरिन्छ । ‘

वस्तुको प्रत्यक्ष विक्री (व्यवस्थापन तथा नियमन गर्ने) ऐन, २०७४ तथा नियमावली २०७६ ले इजाजत नलिइ वस्तुको प्रत्यक्ष बिक्री वितरण गर्ने सम्बन्धी व्यवसाय गर्ने, विभिन्न सदस्य बनाइ पिरामिड शैलीमा (नेटवर्किङ) व्यवसाय गर्न नपाइने स्पष्ट व्यवस्था गरेको छ । यस्तै उपभोक्ता संरक्षण ऐन २०७५ ले पनि यस प्रकृतिको कार्यलाइ अनुचित व्यापारिक क्रियाकलाप मानी दण्डनीय कसुरका रुपमा लिएको छ ।