काठमाडौँ– फिनल्याण्डको हेलसिन्की नगरपालिकाको चुनावमा नेपाली मुलकी ब्योमा ताम्राकार डेपुटी काउन्सिलर पदमा विजयी भएकी छन् । उनी उक्त पदमा दोस्रो कार्याकालका लागि निर्वाचित भएकी हुन् ।

गत सोमबार सम्पन्न चुनावी प्रक्रियामा हेलसिन्की नगरपालिकाबासीले स्थानीय तवरमा राम्रो कार्य सम्पादन गरेका आधारमा ताम्राकारलाई विजयी बनाएका हुन् । ६२६ मत प्राप्त गर्दै उनी दोस्रो कार्यकालको लागि निर्वाचित भएकी हुन् ।

‘यो चुनावमा मेरो उमेदवारीको मूल उद्देश्य आप्रवासीहरुको हक र हितका लागि नीति निर्माण तहमा सहभागिता जनाउनु हो भने एउटा सामाजिक र राजनैतिक व्यक्तित्वको आधारमा नेपाली समाजलाई एकताबद्द्ध बनाउनु मेरो लक्ष्य हो,’ उक्त पदमा दोस्रोपटक जितेपछि ताम्राकारले प्रतिक्रिया दिइन् ।

काठमाडौँको बसन्तपुरमा हुर्किएकी ताम्राकार पछि बुढानीलकण्ठमा बसेकी थिइन् । अध्ययनका क्रममा उनी फिनल्याण्ड पुगेकी हुन् ।

उनले फिनल्याण्डमा रहेका पहिलो पुस्ताका नेपालीहरूले आप्रवासी प्रणाली, शिक्षा, स्वास्थ्यलगायतमा कुनै झमेला भोग्न नपरोस् भनी नीतिगत तहमै सहजता ल्याउन आफू लाग्ने समेत बताएकी छन् ।