जनकपुरधाम– धनुषामा बालिका बलात्कारको आरोपमा प्रहरीले एक बृद्धलाई पक्राउ गरेको छ ।

बुधबार जनकपुरधाम उपमहानगरपालिका–२२ का ५० वर्षीय छेदु मण्डललाई बालिका बलात्कारको आरोपमा प्रहरीले पक्राउ गरेको हो ।

मंगलबार राति बसबिट्टीकी ४ वर्षीया बालिका उनले जर्वजस्तीकरणी गरेको पीडितले उजुरी दिएका छन् । उजुरीका आधारमा जिल्ला प्रहरी कार्यालयले अभियुक्त मण्डललाई पक्राउ गरेको धनुषाका प्रहरी नायव उपरीक्षक मकेन्द्र मिश्रले जानकारी दिए ।

प्रहरीलाई पीडित पक्षले दिएको ब्यान अनुसार मंगलबार साँझ छिमेकीसमेत रहेको मण्डलले बालिकालाई खेलाउनका लागि घरबाट लगेका थिए । खेलाउन लगेको मौका छोपी उनले बालिकालाई आँपको बगैँचा लगी जबरजस्ती करणी गरेका थिए ।

अबेर साँझसम्म घर नफर्केपछि घरपरिवारले बालिकाको खोजविन गर्दैजाँदा घरभन्दा करिब २ सय मिटर पर आँपको बगैँचामा अचेत अवस्थामा देखेपछि प्रहरीलाई खबर गरेका थिए ।

सोही आधारमा प्रहरीले बुधबार बिहान मण्डललाई पक्राउ गरी घटनाको अनुसन्धान जारी राखेको छ ।