काठमाडौँ– नेकपा एमालेको नेपाल–खनाल समूहले जस्तोसुके कारबाही भोग्न आफूहरू कारबाही भोग्न तयार रहेको जनाएको छ । कार्यकर्ता भेलाबारे जानकारी दिन आयोजित पत्रकार सम्मेलनमा समूहका नेता योगेश भट्टराईले आफूहरू कारबाहीका निम्ति तयार रहेको बताएका हुन् ।

पत्रकार सम्मेलनमा नेता भट्टराईले भने, ‘प्रधानमन्त्रीलाई यति मात्रै भन्न चाहन्छु । यो बुद्धको देश हो । शान्तिको देश हो । बालुवाटारमा बोलेको भाषा शक्तिको भाषा छ । त्यो बदल्न अनुरोध गर्दछु । कारबाहीले मुलुक अगाडि बढ्दैन । पार्टी अगाडि बढ्दैन । यो अहंकारपूर्ण अभिव्यक्ति हो । हामी एकपछि अर्को कारबाहीको निम्ति तयार छौं । लामबद्ध छौं । त्यसमा हामीलाई कुनै पश्चाताप हुनेछैन । हिनताबोध छैन । तपाईले गर्ने प्रत्येक कारबाहीका निम्ति लामबद्ध छौं । ’

उनले प्रधानमन्त्री केपी शर्मा ओलीलाई पनि इतिहासले कठोर कारबाही गर्ने बताए । उनले भने, ‘इतिहासले तपाईलाई कठोर कारबाही गर्नेछ । त्यो बेला तपाईंसँग रुने दुई जना पनि हुनेछैनन् ।’

प्रधानमन्त्री तथा पार्टी अध्यक्ष ओलीले भोलिको भेलामा नजान नेता कार्यकर्तालाई सचेत गराएको प्रति पनि समूहले चुनौती दिएको छ । उनले भने, ‘उहाँको तर्कमा कोको नजर लाउन आउनुहुन्छ परिचयसहित आए हुन्छ । यो भेला तपाईंकै हो तपाई आफै आउनुस् । आथित्यता ग्रहण गर्नुस् । तपाईंकै भेलामा आउने तपाईंकै कार्यकर्ता हुन् ।’

हेरौँ भिडियोसहित