पर्वत- वैदेशिक रोजगारीको सिलसिलामा कुवेत लैजाने भन्दै श्रीलङ्का लगेर अलपत्र पार्ने ‘सुवेदी कान्छो’ भन्ने खेमबहादुर सुवेदीलाई प्रहरीले पक्राउ गरेको छ ।

मानव बेचबिखन अनुसन्धान ब्यूरोले सुवेदीलाई पर्वतको कुश्मा नगरपालिका–२ खुर्कोट नयाँपुलबाट पक्राउ गरेको हो । बर्दिया जिल्लाको बढैयाताल गाउँपालिका–३ घर भएका सुवेदीले कुवेतमा घरेलु कामदारका रूपमा लैजाने भन्दै श्रीलङ्का पुर्‍याएर अलपत्र पारेका थिए ।

काठमाडौँबाट नेपालगञ्ज हुँदै भारतको नयाँदिल्लीबाट पुर्‍याइएकी ती महिलालाई सिरक खान र आलिक खानले आफ्नो साथमा राखेर घरबाट बाहिरसमेत जान नदिई थुनामा राखेको अवस्थामा श्रीलङ्काली प्रहरीले फेला पारेको थियो ।

अवैधरूपमा त्यहाँ पुगेकी ती महिलालाई श्रीलंकाली प्रहरीले पक्राउ गरी १० महिना थुनामा राखेको थियो ।

ती महिला श्रीलङ्काको जेलमा रहेको थाहा पाएपछि कोलम्बोस्थित नेपाली दूतावासको सहयोगमा नेपाल फर्काइएको ब्यूरोले जनाएको छ ।

महिलालाई गएको माघ ३० गते नेपाल फर्काइएको थियो । ती महिलाको जाहेरीका आधारमा सुवेदीलाई पक्राउ गरी कारवाही अगाडि बढाएको ब्यूरोले जनाएको छ ।