काठमाडौँ- तालिवानी नियन्त्रणमा एकपछि अर्को अफगानी शहर पर्दै गएपछि त्यहाँ रहेका नेपालीमाझ अन्यौल र त्रासको स्थिति रहेकै बेला परराष्ट्र सचिव भरत पौडेलले अनौपचारिक रुपमा अफगानिस्तानमा काम गर्ने हजारौँ नेपालीहरुबारे नेपाल सरकारलाई जानकारी नभएको र यसबारे यथार्थ बुझ्ने प्रयास गरिरहेको बताएका छन्।

संसदको अन्तर्राष्ट्रिय सम्बन्ध समितिमा आइतबार उपस्थित परराष्ट्र सचिव पौडेलले अफगानिस्तानमा १ हजार ४०० नेपालीमात्र औपचारिक रुपमा रहेको तथ्यांक सरकारसँग रहेको र १४ हजार नेपाली त्यहाँ काम गरिरहेको भन्ने विवरण समाचारमाध्यममा आए पनि यसबारे नेपाल सरकारलाई जानकारी नभएको बताए।

उनले औपचारिक रुपमा गएका १४०० नेपाली राजधानी काबुलमै रहेको र सुरक्षित अवस्थामा रहेको जानकारी दिए। ‘काबुलबाहिर एकैजना नेपाली पनि छैनन्,’ परराष्ट्र सचिव पौडेलले भने। यद्यपि ठूलो संख्यामा नेपालीहरु अफगानिस्तानका विभिन्न स्थानमा काम गरिरहेका छन्।

सचिव पौडेलका अनुसार परराष्ट्र मन्त्रालय र अफगानिस्तान पनि हेर्ने पाकिस्तानस्थित नेपाली दूतावासले अफगानिस्तानमा रहेका नेपालीलाई अनलाइनमार्फत दर्ता हुन आग्रह गरेका छन्।

उनले औपचारिक रुपमा रहेका अधिकांश मानिशहरु अन्तर्राष्ट्रिय नियोग तथा संस्थाहरुमा कार्यरत रहेको जानकारी दिए।