काठमाडौँ– निषेधाज्ञाका समयमा नक्कली सवारी पास लिएर हिँड्ने दुईजनालाई प्रहरीले ललितपुरबाट पक्राउ गरेको छ ।

महानगरीय प्रहरी परिसर ललितपुरका अनुसार पक्राउ पर्नेमा खोटाङ घर भएका दिनेश गुरुङ र अमर गुरुङ छन् ।

परिसर प्रमुख एसएसपी किरण बज्राचार्यका अनुसार उनीहरूले जिल्ला प्रशासन कार्यालयले जारी गरेको पासलाई किर्ते गरेर नक्कली पास बनाई सवारी चलाएको आरोपमा पक्राउ गरिएको हो ।

अमर गुरुङले चलाएको बा ८१ प ७९३ नम्बरको मोटरसाइकल र दिनेशले चलाएको प्रदेश–१–०२–९०४०प ८६११ नम्बरको मोटरसाइकलको सवारी पासको सिरियल नम्बर समान रहेको फेला परेपछि प्रहरीले उनीहरूलाई पक्राउ गरेको हो ।

प्रहरीले अहिले उनीहरु विरुद्ध लिखत सम्बन्धी कसुर ‘किर्ते’ मुद्दामा हिरासतमा लिएर अनुसन्धान गरिरहेको छ।