काठमाडौँ– जनता समाजवादी पार्टी (जसपा)का अध्यक्ष उपेन्द्र यादवले आफूहरु कांग्रेस, माओवादीसँग अझै निकटमा रहेर काम गर्ने बताएका छन् ।

जसपाले प्रधानमन्त्री केपी शर्मा ओलीलाई विश्वासको मत दिने वा नदिने भन्ने विषय नटुंगिएका बेला अध्यक्ष यादवले यो धारणा सार्वजनिक गरेका हुन् । उनले आफ्नो धारणा कांग्रेस माओवादीलाई जानकारी गराएको र सोही अनुसार अघि बढ्ने पनि दाबी गरे ।

जसपा कै अर्का अध्यक्ष महन्थ ठाकूर समूहले प्रधानमन्त्रीसमेत रहेका नेकपा एमालेका अध्यक्ष ओलीसँग निकट रहेर छलफलमा जुटिरहेका बेला यादवले भने विपक्षी मोर्चासँग मिलेर जाने बताएका हुन् ।

यद्यपी अध्यक्ष यादवले पार्टीको विवाद मिलाउन एक ढिक्का भएर अघि बढ्नुपर्ने बताएका छन् ।

आज कार्यकारिणी समितिको बैठक

हिजो अध्यक्ष महन्थ ठाकुर पक्षले राजेन्द्र महतोलाई पार्टी संसदीय दलको नेता चयन गरेपछि अर्का अध्यक्ष यादव र भट्टराई पक्षले केन्द्रीय कार्यकारिणी समितिको बैठक बोलाएको छ ।

पार्टी विधान विपरीत केही नेताहरुको भेलाले राजनीतिक निर्णय गरेपछि त्यसैको विषयमा छलफल गर्न बैठक बोलाइएको यादव पक्षका नेता मोहम्मद इस्तियाक राइनले जानकारी दिए ।

बैठकले पार्टीको विधान विपरीत काम गर्नेहरुविरुद्ध निर्णय लिन सक्ने राईनले बताए ।