काठमाडौं– आफूले अभिनय गरेका प्रत्येक फिल्ममा फरक–फरक गेटअप देखिएर दर्शकको मन जितेका अभिनेता विपिन कार्की यतिबेला नयाँ फिल्म ‘विवेक’को तयारीमा छन् ।

निर्माता माधव वाग्लेको डेब्यू निर्देशन रहने यो फिल्मका लागि गत चैत २८ गतेबाट जनकपुरमा अडिसन भइरहेको छ ।

माधवकै फिल्म ‘छड्के’बाट फिल्मी अभिनयमा पाइला चालेका विपिन यतिबेला तराईको रहनसहनलाई नजिकबाट नियाल्न तराई यात्रामा छन् ।

‘फिल्मको छायांकन जनकपुर र वीरगन्जको सेरोफेरोमा हुने भएकाले आफू यहाँको परिवेश र फरक समुदायमा भिज्नका लागि यहाँ आएको हुँ’, विपिनले भने,‘विवेक नेपाली फिल्म भए पनि यसमा मैथिली र भोजपुरी संवाद पनि राखिएका छन् । त्यहीकारण यी भाषा सिक्न र रहनसहन बुझ्न तराईमा छु ।’

निर्देशक वाग्लेले फिल्मले तराई क्षेत्रको कथा समेट्ने भएकाले तराईकै कलाकारहरुलाई फिल्ममा प्राथमिकता दिइने बताए । लोकनाथ कोइरालाको लेखन रहेको फिल्म नेपाली, मैथिली र भोजपुरी भाषामा निर्माण हुनेछ ।