बैतडी – महाकाली नदीमा डुङ्गा दुर्घटना हुँदा बेपत्ता भएका एक बालकको अवस्था अझै खुल्न सकेको छैन।

गत कात्तिक १० गते शिवनाथ गाउँपालिका–१ स्थित महाकाली नदीको खाँडघाटमा डुङ्गा दुर्घटना हुँदा स्थानीय आठ वर्षीय सन्दीप साउद बेपत्ता भए ।

बेपत्ताको खोजीका लागि नेपाल प्रहरी र सशस्त्र प्रहरी परिचालन गरिनाका साथै भारतीय प्रहरीसँगसमेत सहयोग मागिए पनि सन्दीप अझै फेला नपरेको सन्दीपको जिल्ला प्रहरी कार्यालयका प्रहरी निरीक्षक दर्शन खड्काले जानकारी दिए ।

भारततर्फ गइरहेका बेला डुङ्गा दुर्घटना हुँदा शिवनाथ–१ कै १३ वर्षीया मीना साउदको मृत्यु भएको थियो । दुर्घटनामा परेर बेपत्ता भएकी मीनाको शव कात्तिक ११ गते महाकाली नदीको पारी भारतमा भेटिएको थियो। सोही दिन भारतमै आफन्तले अन्तेष्टी गरेका थिए ।

दशजना सवार डुङ्गा पल्टिँदा आठजना पौडिन सफल भएका थिए ।