काठमाडौं– शिवशक्ति ग्रुप एभरेष्ट प्रिमियर लिग (ईपीएल)मा खेल्ने फ्रेन्चाइज टोली काठमाडौं किंग्स ११ को गोल्ड पार्टनर बन्ने भएको छ ।काठमाडौं किंग्स ११ले सोमबार शिवशक्ति ग्रुपको फ्यामिली ओइल र ऊर्जा राइससँग यस विषयको सम्झौतामा हस्ताक्षर गरेको छ।

शिवशक्ति ग्रुपका निर्देशक सन्दिप अग्रवालले नेपालको खेलकुद क्षेत्र अझै उच्च मुकाममा पुग्न बाँकी रहेको बताए।

‘हामीले नेपाली टिमलाई विश्व मञ्चमा उत्कृष्ट प्रदर्शन गरेको देखिरहेका छौं। एक अग्रणी व्यापारिक ग्रुप भएको नाताले कर्पोरेट उत्तरदायित्वको महत्व बुझेर हामीले नेपाली क्रिकेटरहरुको प्रतिभामा निखार ल्याउन मद्दत गर्ने नेपालकै उत्कृष्ट लिगमा लगानी गरेका हौं’, उनले भने।

यसपालिको ईपीएलमा काठमाडौं किंग्स ११ आकर्षक प्रतिभाले भरिएको टोली हो। जसमा पाकिस्तान राष्ट्रिय टोलीका पूर्वकप्तान शाहिद आफ्रिदी, सन्दिप लामिछाने, सुबास खकुरेल, शेर मल्ल र अरु खेलाडीहरु छन् ।