काठमाडौँ– उर्जा, जलस्रोत तथा सिंचाई मन्त्री पम्फा भुसालले मुलुकका सबै क्षेत्रमा बिजुलीको पहुँच पुर्‍याउने लक्ष्यका साथ काम गर्ने बताएकी छन् ।

बुधबार सिंहदरबारमा पदभार ग्रहण गर्दै मन्त्री भुसालले बिजुली बत्ती बाल्नै नपाउनेहरूको संख्या नेपालमा धेरै रहेको भन्दै बिजुलीको पहुँच चाँडो पुर्‍याउनुपर्ने बताइन् । उनले जलविद्युतको क्षेत्रमा धेरै लक्ष्य राख्ने तर लक्ष्य पूरा नहुने क्रम दोहोरिँदै आएकाले त्यस्तो प्रवृत्तिलाई सुधार गर्नुपर्ने धारणा राखिन् । उनले नेपालमा लोडसेडिङ कहिल्यै नहुनेमा जोड दिनुपर्ने बताइन् ।

आफूले काममा कुनै पूर्वाग्रह नराख्ने तर परिणाममुखी काम निकाल्नुपर्ने स्पष्ट पारिन् । मन्त्री भुसालले देश र जनताको सपना पूरा गर्न आत्मसाथ गर्नुपर्ने बताइन् ।

कृषि प्रधान देश भनिए पनि सिंचाईको समस्या ठूलो रहेको भन्दै उनले सबै कृषि योग्य ठाउँमा बाह्रै महिना सिंचाई पुर्‍याउन लाग्नुपर्ने बताइन् । उनले अहिले बाढीपहिरो र भुक्षय बढेको र विभिन्न निकायसँग समन्वय गरेर यसको रोकथाम तथा नियन्त्रणमा सक्दो कदम चाल्नुपर्ने धारणा उल्लेख गरे ।

मंगलबार सपथ गरेकी मन्त्री भुसालले बुधबार सिंहदरबार पुगेर पदभार सम्हालेकी हुन् । मन्त्रालयमा उनलाई कर्मचारीहरुले स्वागत गरेका थिए ।