लसएञ्जल्स– फिल्म ‘वन्डर वुमन’ अभिनेत्री गल गडोट इजरायल र गाजाबीच भएको तनावका बारेमा गरेको ट्वीटका कारण विवादमा तानिएकी छन् ।

बीबीसीका अनुसार यी इजरायली अभिनेत्री तथा पूर्व ‘मिस इजरायल’ले इजरायल र प्यालेस्टाइनबीचको द्वन्द्वका बारेमा ट्वीट गरेपछि आफ्नो देशमा शान्तिको कामना गरेकी थिइन् ।

‘म निकै दुःखी छु । यो एक दुश्चक्र हो, जुन निकै लामो समयदेखि चलिरहेको छ । इजरायललाई एक स्वतन्त्र र सुरक्षित राष्ट्रका रुपमा बाच्ने अधिकार छ । हाम्रो छिमेकीलाई पनि यो अधिकार छ । म पीडितहरु र उनीहरुको परिवारका लागि प्रार्थना गर्दछु । म यो अकल्पनीय शत्रुतालाई अन्त्य गर्न म मेरा नेतालाई प्रार्थना गर्दछु । यो समस्याको समाधान खोज्नलाई निवेदन गर्दछु । ताकि हामी काँधमा काँध मिलाएर शान्तिसँग बस्न सकौं’, उनले ट्वीटेकी छन् ।

उनको यो ट्वीटपछि ट्वीटर प्रयोगकर्ताले उनको खुलेर विरोध गरेका छन् । कट्टरपन्थी इस्लामीले गडोटको भनाईलाई नरसंहारको आरोप लगाएका छन् । केहीले उनको फिल्मलाई बहिस्कार गर्नसमेत माग गरेका छन् । कतिपयले उनलाई ‘हत्यारा’को आरोप पनि लगाएका छन् ।

गडोटले मोडलिङ र अभिनयमा पाइला चाल्नु अघि दुई वर्ष इजरायली डिफेन्स फोर्समा एक सैनिकका रुपमा काम गरेकी थिइन् ।

गडोट उनको फिल्म ‘वण्डर वुमन १९८४’बाट चर्चामा आएकी थिइन् । उनी चाँडै क्लियोपेट्राको बायोपिकमा देखिँदैछिन् ।