काठमाडौँ– नेकपा माओवादी केन्द्रका अध्यक्ष पुष्पकमल दहाल प्रचण्डले परिवर्तन विरोधी प्रतिगामी शक्तिका विरुद्ध एकताबद्ध र सचेत संघर्षमा उत्रिन आव्हान गरेका छन् ।

मुस्लिम धर्माबलम्बीहरुको चाड इद उल फित्रको उपलक्ष्यमा शुभकामना दिँदै प्रचण्डले नेपाली जनताको बलिदानीपूर्ण संघर्षबाट प्राप्त अधिकारमाथि पनि प्रहार भइरहेको बताए ।

उनले जारी गरेको विज्ञप्तिमा भनेका छन्, ‘अहिले नेपाली जनताको बलिदानीपूर्ण संघर्षबाट प्राप्त हक र अधिकारमाथि प्रतिक्रियाहरुबाट प्रहार भइरहेको छ । परिवर्तन विरोधी प्रतिगामी शक्तिका विरुद्ध एकताबद्ध र सचेत संघर्षमा उत्रिन आव्हान गर्दै विश्वभर फैलिएको कोरोना महामारीबाट बच्न स्वास्थ्य सुरक्षाका सबै मापदण्ड अपनाई सुरक्षित रहन सबैमा आग्रह पनि गर्दछु ।’

प्रचण्डले स्वदेश तथा विदेशमा रहेका सम्पूर्ण मुस्लिम धर्मावलम्बी दिदीबहिनी तथा दाजुभाइहरुमा शुभकामना व्यक्त गर्दै नेपाल बहुजातीय, बहुभाषिक, बहुसांस्कृतिक र बहुधार्मिक देश भएकाले विश्वमा यसको भिन्नै मौलिक पहिचान रहेको पनि बताएका छन् ।

इद–उल–फित्र चाडले नेपाली जनसमुदायका बीचमा सदियौंदेखिको सहिष्णुता र राष्ट्रिय एकताको भावना जागृत भएको प्रचण्डले उल्लेख गरेका छन ।