काठमाडौँ– नेकपा (एकीकृत समाजवादी) को केन्द्रीय कमिटी बैठकको पहिलो दिन विभिन्न आयोगका पदाधिकारीले शपथ ग्रहण गरेका छन् । सम्मानित नेता झलनाथ खनालले राजनीतिक प्रतिवेदन प्रस्तुत गरेका छन् । अध्यक्ष माधवकुमार नेपालले पनि सम्बोधन गरेका छन् ।

ललितपुरको एक होटलमा बसेको बैठकको पहिलो दिन केन्द्रीय अनुशासन आयोग, लेखा आयोग र निर्वाचन आयोगका पदाधिकारीलाई शपथ गराइएको थियो ।

बैठकमा पार्टी अध्यक्ष माधव कुमार नेपालले सम्बोधन गरेका थिए । सो क्रममा उनले खर्चिलो निर्वाचन प्रणाली परिवर्तन गर्नुपर्ने बताएका थिए । अध्यक्ष नेपालले राष्ट्रिय आत्मसमर्पणवादबाट देशलाई जोगाउने काम गरेको उल्लेख गरे ।

बैठकमा सम्मानित नेता झलनाथ खनालले बैचारिक राजनीतिक प्रतिवेदन पेश गरेका छन् । सो क्रममा नेता खनालले जनताको बहुदलीय जनवाद (जबज) अब पार्टीको मार्गदर्शन सिद्धान्त बन्न नसक्ने बताएका छन् । उनले एमालेबाट समाजवादी क्रान्ति पूरा हुन नसक्ने भएपछि आफूहरुले नयाँ पार्टी खोलेको तर्क गरे ।

आफूहरु फुटेको नभई व्यक्तिवादी प्रवृत्तिविरुद्ध विद्रोह गरेको दावी गर्दै खनालले समाजवादी क्रान्तिको नेतृत्व एकीकृत समाजवादीले मात्रै गर्नसक्ने धारणा राखे । उनले एमालेको एक समूह अझै पनि अन्योलमा रहेकाले आफ्नो पार्टीमा आउने संभावना दखेको बताए ।

बैठकमा प्रदेश १ का मुख्यमन्त्री राजेन्द्र कुमार राई र बागमती प्रदेशका मुख्यमन्त्री राजेन्द्र पाण्डेले प्रदेश सरकारको भावी योजनाका बारमा जानकारी गराएको प्रचार बिभाग प्रमुख जगन्नाथ खतिवडाले जानकारी दिए ।

बैठकमा आइतबार केन्द्रीय सचिवालय र कार्यालयहरूबाट भएका काम कारबाहीहरू अनुमोदन हुने कार्यक्रम छ । बिभिन्न प्रस्ताव पारित गर्दै बैठक आइतबार नै सम्पन्न हुने समाजवादीले जनाएको छ ।