काठमाडौँ– नेकपा एमालेको भ्रातृ संगठन युवा संघ नेपालले बाग्मती प्रदेश सांसद नरोत्तम बैद्यविरुद्ध फौजदारी कसुरमा जाहेरी दर्ता गरेको छ ।

प्रधानमन्त्रीविरुद्ध अभिव्यक्ति दिएको भन्दै युवा संघ नेपालका तर्फबाट सांसद बैद्यविरुद्ध जिल्ला प्रहरी कार्यालय मकवानपुरमा जाहेरी दिएको र दर्ता समेत भएको जिल्ला प्रहरी कार्यालय मकवानपुरका सूचना अधिकारी डिएसपी जयश्वेर रिमालले जानकारी दिए ।

उनले मुद्दाका बारेमा सरकारी वकिलको कार्यालयसँग परामर्श गरेर अन्य कारबाही प्रक्रिया अघि बढाउने बताए ।

प्रधानमन्त्री केपी शर्मा ओलीविरुद्ध आपत्तिजनक अभिव्यक्ति दिएको भन्दै एमालेको भातृ संगठन युवा संघ नेपालले जाहेरी दिएको हो ।

सांसद बैद्यले आफ्नो अभिव्यक्ति आवेगमा भएको भन्दै प्रदेशसभा बैठकमै आत्मालोचना गर्दै अभिव्यक्ति रेकर्डबाट हटाउन पनि आग्रह गरेका थिए ।