दोहा- कोरोना महामारीका कारण रोकिएको साउदी अरबको रोजगारीका लागि जाने नेपाली श्रमिकको मागपत्र प्रमाणीकरण मंगलबार अर्थात् जुन १५ मा शुरू गर्ने भएको छ ।

‘फ्रन्ट डेस्क’मा काम गर्ने दूतावासका कर्मचारीमा कोरोना सङ्क्रमण पुष्टि भएपछि रोकिएको माग पत्र प्रमाणीकरण मंगलबार सञ्चालनमा आउने त्यहाँस्थित नेपाली दूतावासले जनाएको छ ।

दूतावासका अनुसार माग पत्र प्रमाणीकरणका लागि आउँदा अब रोजगारदाता कम्पनीको ‘यूजर अकाउन्ट’मा पठाइएको माग पत्र स्वीकृति भएको म्यासेजको प्रिन्ट अनिवार्य गरिएको जनाएको छ ।

दूतावासबाट प्रमाणीकरणको छाप लगाउँदा रोजगारदाता कम्पनीले अब अनलाइन प्रणालीमा अपलोड गरेकै कागजात दूतावासले नै प्रिन्ट गरी त्यसमा नै छाप लगाइदिने पनि दूतावासले जारी गरेको सूचनामा उल्लेख गरिएको छ ।