दोहा- इजरायल र प्यालेस्टाइनबीच हिंसात्मक भिडन्त जारी रहेपछि इजरायलस्थित नेपाली राजदूत डा.अञ्जना शाक्यले नेपालीहरुलाई सुरक्षित रहन अपील गरेकी छन् ।

राजदूत शाक्यले एक विज्ञप्ति जारी गर्दै भनेकी छन्, ‘विगत केही दिनयता इजरायल र प्यालेष्टाइनबीच तनाव बढ्दै गएको छ । जेरुसेलम र दक्षिण इजरायली क्षेत्रमा सैयौं रकेट आक्रमण भएको छ, हिजो राति मात्रै गाजाबाट तेल अबिबलाई निशाना बनाई १८० भन्दा बढी रकेट प्रहार भएको छ, नेपालीहरू सुरक्षित रहनुहोला ।’

साइरन बज्नासाथ घर भित्र भए बङ्कर, भर्‍याङ वा त्यस्तै सुरक्षित क्षेत्रमा जान तथा झ्याल नजिक नजान र घरबाहिर ननिस्कन उनले अपील गरेकी छन् ।

कुनै समस्या परेमा नेपाली दूतावास वा आफ्नो साथीभाई वा इजरायलमा क्रियाशील नेपाली संघसंस्थाका प्रतिनिधिहरुलाई सम्पर्क गर्न पनि उनले आग्रह गरेकी छन् ।