झापा– कोरोना भाइरसको महामारीका कारण पर्यटन व्यवसाय थला परेका बेला झापाको शिवसताक्षीमा भने ४२ करोड रुपैयाँको लागतमा फन पार्क सञ्चालनमा आएको छ ।

शिवसताक्षी नगरपालिका वडा नं. ८ को झिलझिलेमा व्यवसायी राजकुमार संग्रौलाले वाटर किङ्डम पार्क नामको फनपार्क सञ्चालनमा ल्याएका हुन् ।

करीब अढाई बिगाहा क्षेत्रफलमा फैलिएको वाटर पार्कमा पानीसँग सम्बन्धित १४ ओटा खेल तथा मनोरञ्जन स्थलसहितको पार्क सञ्चालनमा ल्याइएको संग्रौलाको भनाइ छ ।

पानीसँग खेल्दै आराम, मनोरञ्जन तथा पर्यंटनका लागि भारतको सिलगुडी जानु पर्ने बाध्यताको अन्त्य गर्न र पूर्वी नेपालमा पर्यटन प्रवर्धनका लागि रिसोर्ट सहितको पार्क सञ्चालनमा ल्याइएको उनले बताए ।

एक लाख भित्र्याउने लक्ष्य

पार्कमा आगामी बैशाख १ गते देखि एक वर्षमा पानीका विभिन्न खेलमा मात्र १ लाख अवलोकनकर्ता भित्र्याउने लक्ष्य रहेको बताइएको छ ।

हिउँद याममा पौडी पारखीहरुको आगमन कम हुने भए पनि विद्यार्थी, वालवालिका तथा युवाहरुलाई लक्षित गरी पार्क, जीपलाइन, साईक्लिङ् लाईन लगायतका खेलको अनुभव पनि लिन सकिने पार्ककी अध्यक्ष मेनुका सिटौलाले बताइन् ।

सिटौलाका अनुसार पार्कमा रेष्टुरेन्ट, सुविधायुक्त सेमीनारकक्ष लगायतको पनि सुविधा छ ।

पार्कले रमाईलो र घुमघामका लागि विदेशीने नेपाली मुद्रा नेपालमै रहन सक्ने वातावरण बनाउन सघाउ पुर्‍याउन र युवालाई स्वदेशमा नै रोजगारीको अवसर दिलाउन पार्क सहयोगी हुने वडाध्यक्ष केहेरसिंह बस्नेतले बताए ।