सुर्खेत– संस्कृति, नागरिक उड्डयन र पर्यटन मन्त्री भानुभक्त ढकालले आगामी चैत्र ७ गते तय भएको केन्द्रीय कमिटी बैठकमा नेकपा एमालेका सबै नेताहरूलाई बोलाइएको जानकारी दिएका छन् ।

नेकपा एमालेका पोलिटब्युरो सदस्यसमेत रहेका मन्त्री ढकालले शुक्रबारको बैठकमा छुटेका सबै नेताहरूलाई बोलाइएको बताएका हुन् ।

शनिबार सुर्खेतको वीरेन्द्रनगरमा एमालेका अगुवा नेता–कार्यकर्ता भेलालाई सम्बोधन गर्दै मन्त्री ढकालले भने, ‘उहाँहरु बैठकमा भाग लिन आउनुहुन्छ, आउनुहुन्न त्यो उहाँहरुको कुरा हो । शुक्रबार पद भन्दा पनि इमान भएका पूर्व माओवादी केन्द्रका व्यक्तिहरूलाई सम्मान गरिएको हो । इमान्दार नेता कार्यकर्तालाई जिम्मेवारी दिइएको हो।’

इमानलाई छोड्दैनौँ भन्ने व्यक्तिहरु आफूहरूसँग आएको उनले दाबी गरे ।

‘अफ्ठ्यारो त छ नै । हिजो पूर्वमाओवादीबाट सांसद बन्नुभएका साथीहरूले सांसद पदबाट राजीनामा दिनुपर्ला । तर, इमान्दारिता ठूलो की पद भन्ने कुरा हो ?’ उनले भने ।

शुक्रबारको बैठकबाट विधान संशोधन गरेको र महाधिवेशन आयोजक कमिटी बनेको खण्डमा अध्यक्ष र महासचिव मात्रै राख्ने व्यवस्था गरिएको पनि ढकालले बताए ।

उनले माधव नेपाल, झलनाथ खनाल लगायतलाई व्यङ्ग्य गर्दै एमाले सम्झिरहनेहरूको पद केही नगरेको बताए ।

माधव नेपाल पक्षका नेता कार्यकर्तालाई ज्वरो आएको र एक सातामा ज्वरो सेलाएपछि पार्टी बैठकमा आउने र पार्टी काममा लाग्ने विश्वास पनि व्यक्त गरे ।