काठमाडौँ– राष्ट्रियसभा सदस्य रामनारायण बिडारीले प्रधानमन्त्री केपी ओलीका कारण मुलुकमा राजनीतिक अस्थिरता निम्तिएको आरोप लगाएका छन् ।

सोमबारको राष्ट्रियसभाको बैठकमा उनले प्रधानमन्त्री ओलीले मुलुकमा लोकतन्त्रका लागि भएका आन्दोलनका सहयात्रीसँग सहमति र सहकार्य नगरी बहुमतको दम्भका आधारमा अघि बढ्ने प्रयासले राजनीतिक अस्थिरता निम्तिएको आरोप लगाए ।

सरकारले पनि सही नेतृत्व र सुझबुझ ढङ्गबाट निर्णय नदिए संसद् मात्र नभई राज्यका सबै संयन्त्र र निकाय लथालिङ्ग हुने उदाहरण देखिएको बताए ।

जनता समाजवादी पार्टी नेपालका शेखरकुमार सिंहले बाढी र डुबानका कारण अहिले किसान मारमा परेकाले तिनलाई राहतका कार्यक्रम ल्याउन सरकारसँग माग गरे ।

सांसद शारदादेवी भट्टले मुलुकको तराई भेगका अधिकांश क्षेत्र डुबानमा परेर बालीनालीको क्षति भएकाले किसानलाई उचित क्षतिपूर्ति दिलाउन माग गरिन् ।

कांग्रेसका प्रकाश पन्थले जनताले अपेक्षा गरेअनुरुप जनप्रतिनिधिले भूमिका निर्वाह गर्न नसकेको जनाउँदै राष्ट्रियसभाको कामकारवाही अझ प्रभावकारी हुनुपर्नेमा जोड दिए ।

त्यस्तै सांसद भैरवसुन्दर श्रेष्ठले राष्ट्र र जनताका पक्षमा राम्रो काम गरेको देखेर अतालिएर प्रमुख प्रतिपक्षलगायत दलले प्रधानमन्त्रीविरुद्ध घेराबन्दी गरेको बताए ।

राष्ट्रियसभामा ‘राष्ट्रिय प्राकृतिक स्रोत तथा वित्त आयोगको दोस्रो वार्षिक प्रतिवेदन, २०७६/०७७’ पेश भएको छ ।
यस्तै विधायन व्यवस्थापन समितिका सभापति पर्शुराम मेघी गुरुङका तर्फबाट सदस्य देवेन्द्र दाहालले ‘योगमाया आयुर्वेद विश्वविद्यालय विधेयक, २०७६ सम्बन्धी समितिको प्रतिवेदन’ पनि सभासमक्ष पेश गरे । राष्ट्रियसभाको अर्को अधिवेशन आकस्मिक रूपमा अन्त्य भएको छ ।

सोमबार सर्वोच्च अदालतले विघटित प्रतिनिधिसभा पुनर्स्थापित गरेसँगै राष्ट्रपति विद्यादेवी भण्डारीले अपराह्न राष्ट्रियसभाको अधिवेशन अन्त्य गरेकी हुन् ।