धरान– धरानमा गत फागुन ११ गते कोरोनाविरुद्धको खोप कोभिशिल्ड लगाई दोस्रो डोज छुट भएका व्यक्तिहरुका लागि आउँदो असार १ गते खोप लगाउन आह्वान गरिएको छ ।

धरान उपमहानगरपालिकाको स्वास्थ्य महाशाखाले आज उपमहानगर परिषरमा पत्रकार सम्मेलन गर्दै कोभिशिल्ड लगाई दोस्रो डोज छुट भएका व्यक्तिहरुका लागि आउँदो असार १ गते खोप लगाउने जानकारी दिएको हो ।

स्वास्थ्य महाशाखा प्रमुख उमेश मेहताले आउँदो असार १ गते (मङ्गलबार) धरानको छाता चोकस्थित पुरानो हस्पिटलमा दोस्रो डोज छुट भएकाको लागि कोरोना विरुद्धको खोप कोभिशिल्ड लगाईने जानकारी दिए । उनका अनुसार पुरानो हस्पिटलमा असार १ गते बिहान १० बजेदेखि ४ बजेसम्म कोरोना विरुद्धको खोप कोभिशिल्ड लगाईने छ ।

पत्रकार सम्मेलनमा स्वास्थ्य महाशाखा प्रमुख मेहताले धरान उपमहानगरपालिका अन्तर्गतको विभिन्न खोप केन्द्रहरुबाट गत माघ १४ गतेदेखि फागुन ११ गते सम्ममा १ हजार ३ सय ६६ जना व्यक्तिलाई कोरोना विरुद्धको खोप कोभिशिल्ड लगाइएको जानकारी दिए । गत वैशाख ७ गतेदेखि जेठ ११ गतेसम्म कोभिशिल्डको दोस्रो डोज खोप सञ्चालन भई अधिकांश व्यक्तिलाई दोस्रो डोजको खोप पूरा भएको थियो । सो अवधिमा सञ्चालित खोप कार्यक्रममा विभिन्न कारणले केही व्यक्तिहरु छुटेका थिए । उनीहरुलाई असार १ गते कोभिशिल्ड खोप लगाईने भएको हो ।