काठमाडौँ – चर्च ब्वाइज युनाईटेडले सहिद स्मारक ‘सी’ डिभिजन लिग फुटबलको उपाधि जितेको छ । सोमबार भएको सुपर सिक्सको अन्तिम लिग खेलमा झापा फुटबल क्लबलाई २-१ गोल अन्तरले पराजित गर्दै चर्च ब्वाइजले उपाधि जितेको हो ।

सातदोबाटोस्थित एन्फा कम्प्लेक्समा चर्च ब्वाइजलाई जित दिलाउन रिजन माझी र सोम थापाले एक एक गोल गरे । झापाका श्यामु मुर्मुले एक गोल फर्काए ।

पहिलो हाफको इन्जुरी समयमा झापाका श्यामुले एक गोल फर्काएपनि चर्च २-१ ले विजयी भयो । उपाधिसँगै चर्च ब्वाइज ‘बी’ डिभिजन लिगमा समेत बढुवा भएको छ । चर्चले १० लाख नगद समेत प्राप्त गर्‍यो ।

‘सी’ डिभिजन लिगमा बढुवा भएको एक वर्ष नपुग्दै चर्च ब्वाइज ‘बी’ लिगमा बढुवा भएको हो । चर्चले उपाधि जित्ने क्रममा १० अंक जोड्यो ।

यस्तै वीरञ्गज युनाइटेड क्लब र सामाजिक युवा क्लब पनि ‘बी’ डिभिजन लिगमा बढुवा भएका छन् ।

खालीबारी युथ क्लबलाई ३-१ गोल अन्तरले पराजित गर्दै वीरञ्गज बढुवा भएको हो । वीरञ्गज ‘सी’ मा बढुवा भएको एकै वर्षमा ‘बी’ लिगमा उक्लिएको हो ।

सामाजिक भने २ वर्षपछि ‘बी’ लिगमा बढुवा भएको हो । सामाजिकले अन्तिम लिग खेलमा वीरञ्गज युथ एकेडेमीलाई १-० गोल अन्तरले पराजित गर्‍यो ।

दोस्रो भएको वीरञ्गजले ७ लाख र तेस्रो भएको सामाजिकले ४ लाख प्राप्त गरेको छ । सानोगौचरण युवा क्लब ‘सी’ डिभिजनबाट घटुवा भएको छ ।