काठमाडौँ– नेकपा एमालेका अध्यक्ष केपी शर्मा ओलीले आत्म आलोचना गरेर पार्टीमा फर्किन वरिष्ठ नेता माधवकुमार नेपाललाई सुझाव दिएका छन् ।

नेपाल उत्पीडित जातीय मुक्ति समाजको राष्ट्रिय भेलालाई सोमबार सम्बोधन गर्दै प्रधानमन्त्री एवं एमाले अध्यक्ष ओलीले गुटबन्दी गरेर आउनेलाई स्वीकार गर्न नसकिने बताए ।

आत्म आलोचना गरेर फर्किने नेतालाई पार्टीमा स्वागत गर्ने उनको भनाइ छ ।

‘अहिले पनि पार्टीबाट निष्कासन गरेका छैनौं । आत्म आलोचना गरेर फर्किनुस्, पार्टीमा विना भेदभाव काम गर्न दिन्छौं,’ ओलीले भने ।

अब पार्टीमा गुटबन्दी नचल्ने ओलीले दाबी गरे । उनले भने,‘पार्टीले समूहगत रुपमा डिल गर्दैन् ।’

नेपालले अहिलेसम्म गरेका ‘अपराधपूर्ण काम’को आत्म आलोचना गर्नुपर्ने ओलीले बताए । नेता नेपालका गतिविधिहरुलाई आफूले अहिले पनि नियालिरहेको बताउँदै भने, ‘म सीमा हेरिरहेको छु, पार्टीलाई ध्वस्त पार्न खोजे ठीक हुँदैन ।’

सम्बोधनकै क्रममा प्रधानमन्त्री ओलीले आफूसँग संसदमा बहुमत रहेकाले राजीनामा नदिने अडान दोहोर्‍याए ।

प्रधानमन्त्रीबाट हटाउन मन भए समर्थन फिर्ता लिन समेत माओवादी केन्द्रलाई ओलीले चुनौती दिए ।

उनले समर्थन फिर्ता लिन नसकेर राजीनामा माग्ने ‘प्रचण्ड शैली’लाई हरुवाको संज्ञा दिए । ओलीले माओवादीको समर्थन आफूलाई नचाहिएको बताए । उनले भने , ‘यस्ता धाक धक्कुसँग म डराउदिनँ ।’

ओलीले माओवादी र माधव नेपालहरू चुनावबाट भागिरहेको आरोप पनि लगाए ।

एमसीसीबारे समामुखमाथि खनिए ओली

सम्बोधनकै क्रममा ओलीले एमसीसी अघि नबढाएकोमा सभामुख अग्निप्रसाद सापकोटासँग असन्तुष्टि पोखे । उनले एमसीसी संसदले निर्णय गर्नुपर्ने बताए । निर्यणका लागि सरकारले प्रस्ताव संसमा पेश गरेको बताए ।

उनले प्रश्न गरे, ‘सरकारले पेश गरेको प्रस्ताव रोक्ने अधिकार सभामुखलाई हुन्छ ? सभामुखले निर्णयार्थ पेस गर्नुपर्दैन ? पेश नगर्ने ?’

ओलीले सभामुखले मर्यादा पालना नगरेको, संविधान र कानूनको मतलब नगरेको तथा बलजफ्ती गरेको आरोप समेत लगाए ।

‘कानूनको संविधानको मतलब छैन, बलजफ्ती छ, यस विषयमा नेपाली कांग्रेस एक शब्द बोल्न सक्छ ? मुखमा पानी हालेर किन बस्छ ? यो लोकतान्त्रिक अभ्यास हो कि होइन ? किनभने उनीहरु साँठगाँठ खोजिरहनुभएको छ,’ उनले भने ।

हेरौँ भिडियो