मुम्बई– बलिउड अभिनेता मनोज वाजपेयीलाई कोरोना संक्रमण भएको छ । मनोजको टिमले उनलाई कोरोना संक्रमण भएको पुष्टि गरेको छ ।

टाइम्स अफ इण्डियामा प्रकाशित समाचारअनुसार कोभिड १९ को रिपोर्ट पोजेटिभ आएपछि आफूलाई घरकै क्वारेन्टाइनमा राखेका छन् । मनोज फिल्म ओटीटी प्लेटफर्मका लागि निर्माण गरिएको फिल्म ‘डिसप्याच’को सुटिङमा व्यस्त थिए ।

यो फिल्मका निर्देशक कानु बेहललाई कोरोना संक्रमण भएपछि मनोजले पनि आफ्नो टेस्ट गराएका थिए । टेस्टपछि उनको रिपोर्ट पोजेटिभ आएको थियो ।

अभिनेता र निर्देशकलाई कोरोना संक्रमण भएपछि फिल्मको सुटिङ केही महिनाका लागि रोकिएको छ । ‘अभिनेताको स्वास्थ्य अवस्था अहिले ठिक छ । उनी घरकै क्वारेन्टाइनमा सावधानीका साथ बसिरहेका छन्’ मनोजको टिमका एक सदस्यले भने ।

मनोज अभिनित बहुप्रतिक्षित सिरिज ‘द फेमिली मेन’को दोस्रो सिजन ‘द फेमिली मेन २’ अघिल्लो महिना अमेजन प्राइममा रिलिज हुने तयारीमा थियो ।

तर सिरिज ‘ताण्डव’लाई लिएर भएको विवादका कारण मनोजको सिरिज रिलिज हाललाई स्थगित गरिएको छ ।