काठमाडौँ- मोरङ र सुनसरीमा भएका दुर्घटनामा दुई जनाको मृत्यु भएको छ ।

मोरङको सुनवर्षी नगरपालिका–४ स्थित बटरबारी सडक खण्डमा बिहीबार राति भएको ट्याक्टर दुर्घटनामा चालक सुनवर्षी–४ का २३ वर्षीय मिथिलेश यादवको मृत्यु भएको छ ।

दुर्घटनामा परेर गम्भीर घाइते भएका उनको उपचारका क्रममा रंगेली अस्पतालमा राति साढे १० बजेतिर मृत्यु भएको प्रहरीले जनाएको छ ।

को १ त ३६७० नम्बरको खाली ट्याक्टर आफै अनियन्त्रित भएर दुर्घटना भएको  प्रहरीले जनाएको छ ।

सुनसरीको धरान उपमहानगरपालिका–४ मा  दुर्घटनामा परेर सह–चालकको मृत्यु भएको छ ।

आज बिहान भएको दुर्घटनामा ट्रकका सह–चालक ३० वर्षीय विशाल खड्काको घटनास्थलमै मृत्यु भएको प्रहरीले जनाएको छ । उनको ठेगाना खुलेको छैन ।

ना ६ ख ६५५१ नम्बरको ट्रक ब्रेक फेल भएर बिहान ४ बजेतिर दुर्घटनामा परेको हो ।