चितवन– नेकपा (माले) ले पार्टीको ८औं राष्ट्रिय महाधिवेशन चितवनमा गर्ने भएको छ । चितवनमा १०औं राष्ट्रिय महाधिवेशन गर्नको लागि नेकपा (एमाले) ले तयारी गरिरहेका बेला मालेले पनि बिहीबार पत्रकार सम्मेलन गरी आफ्नो महाधिवेशन चितवनमा गर्ने निर्णय गरेको हो ।

महाधिवेशनमा देशभरबाट ३५० प्रतिनिधि सहभागी हुने महाधिवेशन मूल आयोजक समितिका संयोजक तथा पार्टी स्थायी समिति सदस्य दिननाथ घिमिरेले जानकारी दिए । २७–२९ कात्तिकमा हुने महाधिवेशनको लागि तयारी तीव्र पारिएको उनको भनाइ छ ।

मालेको महाधिवेशन नारायणगढस्थित नारायणी कला मन्दिरमा हुने उनले जानकारी दिए । महाधिवेशनबाट ७५ सदस्यीय केन्द्रीय कमिटी, ११ सदस्यीय स्थायी समिति, र २१ जना पोलिटब्यूरो सदस्य चयन हुने उनको भनाइ छ । त्यस्तै, २० वटा विभागको नेतृत्व पनि चयन हुनेछ ।

‘सबै कमिटी र समितिको नेतृत्व सर्वसम्मतिले गर्ने हाम्रो कोसिस हुनेछ’, उनले भने, ‘महाधिवेशनमा अबको नयाँ जनवाद, संगठनात्मक सिद्धान्त, कार्य नीतिमाथि छलफल हुन्छ । महाधिवेशनमा प्रस्तुत हुने राजनीतिक प्रतिवेदन, संगठनात्मक प्रतिवेदन, आर्थिक प्रतिवेदन र पार्टीको विधान संशोधन लगायतका दस्ताबेजमाथि पनि समूहगत छलफल गरिनेछ ।’

महाधिवेशनको उद्घाटन गर्नुअघि नारायणगढमा जुलुस निकालिने उनले बताए । प्रदेश संरचना र एमसीसी खारेज अभियानलाई थप सशक्त बनाउँदै स्थानीय तहलाई अधिकार सम्पन्न बनाउने कुरामा पार्टीका मुख्य ध्यान हुने उनको भनाइ छ । नेकपा माले ११ पुस २०३५ मा स्थापना भएको हो । २०५८ मा यसको पुनर्गठन गरिएको थियो ।